[මෙය The hysterical anti-Russian campaign and the US-NATO drive to war with Russia යන මැයෙන් 2022 මාර්තු 05 පල වූ ලිපියේ පරිවර්තනයයි.]
අතීතයේ අධිරාජ්‍යවාදී යුද්ධ යුක්තියුක්ත කිරීම සඳහා ගෙන ගිය මතවාදී ප්‍රචාරක ව්‍යාපාර හැම විටම විකෘතිකරනයන්, ප්‍රබන්ධයන් සහ අමූලික බොරු මත රඳා පැවතුනි. ලේඛක ස්ටෙෆාන් ස්වීග් පලමු ලෝක සංග්‍රාමය පුපුරා යාම පිලිබඳ ඔහුගේ මතකයන් තුල නිරීක්ෂනය කල පරිදි, 'සියලුම සටන් කරන ජාතීන් දැනටමත් අධික සංක්ෂෝභයක සිටි අතර නරකම කටකතාව වහාම සත්‍ය බවට පරිවර්තනය විය, වඩාත්ම අභූත අපහාසය විශ්වාස කලහ.'
එලෙසින්ම පුටින් යුක්‍රේනය ආක්‍රමනය කිරීමෙන් පසු සතියක් තුල, එක්සත් ජනපද-නේටෝ යුද ධාවනය නීත්‍යානුකූල කිරීමේ අරමුන ඇතිව සංගත මාධ්‍ය සහ මධ්‍යම පන්තියේ කොටස් විසින් මෙහෙයවන ලද උමතු රුසියානු විරෝධී ව්‍යාපාරය බිහිසුනු පරිමානයක් අත්කරගෙන ඇත. ගායකයින්, කලාකරුවන්, වාදන වෘන්ද හසුරවන්නන්, නිෂ්පාදන සහ බලලුන් පවා ඔවුන්ගේ රුසියානු ජාතිකත්වය හෝ සම්භවය හේතුවෙන් පමනක්ම බැහැර කරනු හෝ පිටුවහල් කරනු ලැබ ඇත.
අඟහරුවාදා, මියුනිච් නගරාධිපති ඩීටර් රයිටර්, රුසියානු වාදන වෘන්ද හසුරවන්නෙකු වන වලේරි ගර්ගීෆ්, මියුනිච් ෆිල්හාර්මනික් හි ප්‍රධාන අධ්‍යක්ෂක තනතුරෙන් වහාම නෙරපා හරින බව නිවේදනය කලේය. පුටින්ගේ යුක්‍රේන ආක්‍රමනයෙන් ටික වේලාවකින් පසු සමාජ ප්‍රජාතන්ත්‍රවාදියෙකු වන රයිටර්, ගර්ගීෆ්ට අවසාන නිවේදනයක් නිකුත් කලේය: එක්කෝ ඔහු රුසියානු රජය ප්‍රසිද්ධියේ විවේචනය කල යුතුය, නැතහොත් ඔහුව නෙරපා හරිනු ඇත. ගර්ගීෆ් ප්‍රතිචාර දැක්වීමට අපොහොසත් වූ පසු, රයිටර් වහාම ක්‍රියාත්මක වන පරිදි ලෝක ප්‍රසිද්ධ වාදන වෘන්ද හසුරුවන්නා සමඟ ඇති සියලු ම ගිවිසුම් අවලංගු කලේය.
සොප්‍රානෝ තරුවක් වන ඇනා නෙට්‍රෙබ්කෝට ද නිව් යෝර්ක්හි මෙට්‍රොපොලිටන් ඔපෙරාහිදී සමාන ඉරනමක් අත්විය. නෙට්‍රෙබ්කෝ ගේ 'පුටින් සබඳතා', එනම් ඇගේ රුසියානු ජාතිකත්වය පිලිබඳ නිව් යෝර්ක් ටයිම්ස් විසින් කරන ලද තිරසාර උද්ඝෝෂනයකින් පසුව, මෙට් ඇන්ඩ් බර්ලින්ස් ස්ටාට්සෝපර් (Met and Berlin’s Staatsoper) හි ඇයගේ ඉදිරි කටයුතු වලින් ඉවත් විය. නෙට්‍රෙබ්කෝ, යුද්ධයට තම විරුද්ධත්වය ප්‍රකාශ කරමින්, “කලාකරුවන්ට හෝ වෙනත් ඕනෑම පුද්ගලයෙකුට තම දේශපාලන අදහස් ප්‍රසිද්ධියේ ප්‍රකාශ කිරීමට සහ ඔවුන්ගේ මව්බිම හෙලා දැකීමට බල කිරීම සාධාරන නොවේ” යැයි පැවසුවාය.
ඒ හා සමානව ජාත්‍යන්තර සිනමා උලෙලවල් තහනම් කර ඇති රුසියානු සිනමාකරුවන්ට සහ පැරාලිම්පික්, පාපන්දු ලෝක කුසලාන සහ අනෙකුත් ක්‍රීඩා තරඟවලට තරඟ කිරීම තහනම් කර ඇති ක්‍රීඩක ක්‍රීඩිකාවන්ට සලකා ඇත්තේ ම්ලේච්ඡ ලෙස ය. උතුරු ඇමරිකාවේ සහ යුරෝපයේ සිල්ලර වෙලෙන්දෝ රුසියානු නිෂ්පාදන ඔවුන්ගේ රාක්කවලින් ඉවත් කර ඇත. ඉතාලියේ විශ්ව විද්‍යාලයක්, අපරාධය සහ දඬුවම සහ කරමසොව් සහෝදරයෝ වැනි ලෝක සාහිත්‍යයේ සුවිශේෂී කෘති රචනා කල, 1881 දී මිය ගිය රුසියානු නවකතාකරුවෙකු වන ෆියොදෝර් දොස්තයෙව්ස්කිගේ නවකතා පදනම් කරගත් සාහිත්‍ය පාඨමාලාවක් තහනම් කිරීමට උත්සාහ කිරීමට තරම් දුර ගියේය. මිලානෝ බිකොකා විශ්ව විද්‍යාලය පසුබසිනු ලැබුවේ මහජන විරෝධයකින් පසුව පමනි.
මෙම ස්වෝත්තමවාදී උද්ඝෝෂනය මෙහෙයවනු ලබන්නේ යුද උන වැලඳී ඇති ඉහල මධ්‍යම පන්තියේ කොටසක් විසිනි. තත්වය වඩාත් හොඳින් දැනගත යුතු මාධ්‍ය ආයතන, ශාස්ත්‍රාලිකයින් සහ විද්‍යාඥයන්, අධිරාජ්‍යවාදී බලවතුන් ගෙනයන යුද ගැති ප්‍රචාරනය වැලඳ ගෙන ඇත. එම ප්‍රචාරනයට අනුව දුෂ්ඨ මහ මොලකරු ව්ලැදිමීර් පුටින් 2022 පෙබරවාරි 24 දා රුසියානු හමුදා යුක්‍රේනයට යවන තුරු ලෝකය සාමකාමී පාරාදීසයක් විය. රුසියාවට පනවා ඇති සම්බාධක පිලිබඳව ඔවුන් ඔල්වරසන් දී ඇත, එය ආර්ථික යුද්ධයකට සමාන වන අතර එය ජනගහනය විනාශ කරනු ඇත, එසේම ඔවුන් නැගෙනහිර යුරෝපය පුරා නේටෝ බලවතුන් විසින් දැවැන්ත මිලිටරි ගොඩ නැගීම අගය කලහ.
දක්ෂිනාංශික රුසියානු ස්වෝත්තමවාදයට ආයාචනා කිරීම මගින් පුටින් යුක්තිසහගත කල යුක්‍රේනයේ ප්‍රතිගාමී ආක්‍රමනයට විරුද්ධ වීමට ප්‍රතිපත්තිමය, වාම පදනමක් ඇති බව ඔවුන් කිසිවකුට හෝ නොහැඟුනු බව පෙනේ.
යුක්‍රේනයේ, රුසියාවේ සහ ජාත්‍යන්තරව ගෝලීය යුද විරෝධී ව්‍යාපාරයකට කම්කරුවන් එක්සත් කිරීමේ අරගලය තුල මුල් බැසගත් මෙම විරුද්ධත්වයට, අධිරාජ්‍යවාදී බලවතුන්ගේ කොල්ලකාරී අවශ්‍යතා වලට අනුගත වීම හෝ යුක්‍රේනයේ ෆැසිස්ට්වාදයේ භූමිකාව වසන් කිරීම අවශ්‍ය නොවේ. 'ප්‍රජාතන්ත්‍රවාදී සහ ස්වාධීන යුක්‍රේනයක්' සඳහා වන ඔවුන්ගේ සටනේ නේටෝ බලවතුන්ගේ සහචරයින්, අන්ත දක්ෂිනාංශික ජාතිකවාදීන් වීම සහ ඔවුන්ගේ ෆැසිස්ට්වාදී දේශපාලන මුතුන්මිත්තන් දෙවන ලෝක යුද්ධ සමයේදී නාසීන් සමඟ සහයෝගයෙන් කටයුතු කිරීම පිලිබඳව ලැජ්ජා සහගත නිශ්ශබ්දතාවයක් පවත්වා ගැනීමට කිසිවෙකු බැඳී නැත.
මධ්‍යම පන්තියේ මෙම ස්වයංතෘප්ත ස්ථරයන් අතර, යුක්‍රේන-රුසියා යුද්ධය විසින් මතු කරන ලද මෙම ඓතිහාසික හා දේශපාලන ප්‍රශ්න පිලිබඳ කිසිදු විවේචනාත්මක පරීක්‍ෂනයකට ඉඩ නොදේ. ලෝක සමාජවාදී වෙබ් අඩවිය ඊයේ සඳහන් කල පරිදි, “ගැටුම වාර්තා කිරීමේදී, මාධ්‍යවේදය සහ ප්‍රචාරනය අතර වෙනස අකාමකා දමා ඇත. සෑම දෙයක්ම කලු සහ සුදු පාටින් ඉදිරිපත් කර ඇති මාධ්‍යයන් මොලය වෙහෙසීමට ඉඩක් ලබා නොදේ. විශ්ව ආඛ්‍යානයට අනුව රුසියාව යුක්‍රේනය ආක්‍රමනය කලේ, සදාම් හුසේන්, ඔසාමා බින් ලාඩන් සහ ස්ලොබොඩාන් මිලොසෙවික් නම් යක්ෂයින් සිටි ආකාරයටම පුටින් නම් යක්ෂයෙක් එහි ද සිටින නිසාය.
“ඓතිහාසික හේතුඵල සම්බන්ධය පිලිබඳ සංකීර්න ගැටලු සමඟ දශක ගනනාවක් පොරබදමින් සිටින අය ද ඇතුලු උගත් ශාස්ත්‍රඥයෝ, බුද්ධිමය බිඳවැටීමේ තත්වයක සිටිමින් සීඑන්එන්, එම්එස්එන්බීසි සහ ඇත්ත වශයෙන්ම, නිව් යෝර්ක් ටයිම්ස් පුවත්පත, ඔවුන් වෙනුවෙන් සිතීමට ඉඩ දීමෙන් සෑහීමකට පත්ව සිටිති. පිලිතුරු දීම කෙසේ වෙතත් බැරෑරුම් ප්‍රශ්න අසන්නේ වත් නැත.”
රුසියානු වන සියලු දේම පිටුවහල් කිරීම යුක්ති සහගත කිරීමට යත්න දරමින්, ඔපෙරා සමාගම් කලමනාකරුවන්, ක්‍රීඩා නිලධාරීන් සහ විද්වතුන් පවත්වන දේශනවලට සවන්දෙන යමෙකුට, එක්සත් ජනපද අධිරාජ්‍යවාදය සහ එහි නේටෝ සහචරයින් පසුගිය දශක තුන පුරා අඛන්ඩ යුද්ධයක යෙදී සිටින බව කිසි විටෙකත් දැන නොගනු ඇත. සර්බියාවට ම්ලේච්ඡ ලෙස බෝම්බ හෙලීම, ඉරාකය ආක්‍රමනය කිරීම, කලු ජාතිකයින්ට වධහිංසා පැමිනවීමේ වැඩසටහන්, “භීෂන අඟහරුවාදා” ඝාතන සහ ඇෆ්ගනිස්ථානය, ලිබියාව, සිරියාව සහ වෙනත් තැන්වල සිවිල් වැසියන් සමූල ඝාතනය කිරීම ඇතුලු ක්ලින්ටන්, බුෂ් හෝ ඔබාමා පාලනාධිකාරයේ බිහිසුනු යුද අපරාධවලට පිලිතුරු දෙන ලෙස මෙම පුද්ගලයින් හෝ ආයතනයන් කිසිවෙක් ඇමරිකානු සංගීතඥයන්ගෙන් හෝ කලාකරුවන්ගෙන් ඉල්ලා සිටියේ නැත.
සම්ප්‍රදායික තක්සේරු මගින් යෝජනා කරන පරිදි, මිලියන හතරක පමන මිනිසුන්ගේ මරනයට හේතු වූ ඇමරිකානු අධිරාජ්‍යවාදයේ කොල්ලකාරී යුද්ධ හේතුවෙන්, එක්සත් ජනපද රජයේ සම්මානයක් පිලිගත්, ධවල මන්දිරයේ තම ප්‍රසංග ඉදිරිපත්කල හෝ ආන්ඩුවේ ශාස්ත්‍රීය හෝ විද්‍යාත්මක උපදේශකයෙකු ලෙස සේවය කල කිසිවෙකුට ඔවුන්ගේ වෘත්තීය ජීවිතයෙන් බැහැර කිරීමේ හෝ අවසන් කිරීමේ තර්ජනයක් එල්ල වී නැත.
රුසියානු-විරෝධී හිස්ටීරියාව අවුලුවාලීමේ යෙදී සිටින බොහෝ පුද්ගලයන්, පලස්තීනුවන්ට එරෙහි සියොන්වාදී පාලන තන්ත්‍රයේ කුරිරු මර්දනයට විරෝධය දැක්වීම සඳහා ඊශ්‍රායල විද්වතුන්ට එරෙහි තහනම හෙලා දැකීමේදී ඊට නොඅඩුව හඬ නැගූහ. ගාසා තීරයේ දරිද්‍රතාවයට පත් ජනගහනය ඊශ්‍රායල හමුදාවේ ඉවබව නැති ප්‍රචන්ඩත්වයට මුහුන දෙන අතර, ආධාර සංවිධාන විසින් එය එලිමහන් සිරකඳවුරකට සමාන කර ඇත. එහෙත් නිෂ්පාදන වර්ජනය, ඉවත් කිරීම සහ සම්බාධක (බීඩීඑස්) ව්‍යාපාරයේ ආධාරකරුවන්, ඊශ්‍රායල විද්වතුන් සමඟ සබඳතා අත්හිටුවන ලෙසත් ඊශ්‍රායල නිෂ්පාදන තහනම් කරන ලෙසත් ඉල්ලා සිටින විට, ඔවුහු සාමාන්‍යයෙන් “යුදෙව් විරෝධීන්” ලෙස ගර්හාවට පත් කරනු ලැබෙති. 2019 වන විට එක්සත් ජනපද ප්‍රාන්ත 27 ක්, රජයේ ආයතනයන්ට සහ රාජ්‍ය සේවකයින්ට, ඊශ්‍රායලය වර්ජනය කිරීමට සහාය දක්වන කවරෙකු හෝ සමග ව්‍යාපාර කිරීම තහනම් කරමින් නීති සම්මත කර ඇත.
ඉහල මධ්‍යම පන්තියේ යුද ගැති ස්ථරයන් මෙම අශික්ෂිත ද්විත්ව ආස්ථානයන් තුල වරදක් දකින්නේ නැත, මන්ද ඔවුන් බොහෝ කලකට පෙර ඇමරිකානු සහ යුරෝපීය අධිරාජ්‍යවාදය සමග ඔවුන්ගේ සමාදානය ඇති කර ගත් බැවිනි. දෙවන ලෝක සංග්‍රාමයෙන් පසු ජර්මානු ගුවන් හමුදාවේ පලමු යුද සහභාගිත්වය වූ 1999 දී සර්බියාවට එරෙහි නේටෝවේ ගුවන් යුද්ධයේදී, සර්බියානු පිරිමින්, කාන්තාවන් සහ ලමයින් ඝාතනය කිරීම අමන කුහකත්වයෙන් යුක්ති සහගත කිරීමට සූදානම් වූ, 'මානව හිමිකම්' ආරක්ෂා කරන නේටෝවේ යුධ ගුවන් යානා ගැන කම්පා වන බුද්ධිමතුන්ගේ සහ හිටපු-රැඩිකල් දේශපාලනඥයන්ගේ හිඟයක් නොවීය.
මෙම ප්‍රපංචයේ වෛෂයික මූලයන් පැහැදිලි කරමින් ලෝසවෙඅ ජාත්‍යන්තර කර්තෘ මන්ඩලයේ සභාපති ඩේවිඩ් නෝර්ත් 1999 දී මෙසේ ලිවීය:
සියලුම ප්‍රධාන ධනේශ්වර රටවල සමාජ ව්‍යූහය සහ පන්ති සබඳතා වලට, 1980 ගනන්වල මුල් භාගයේ ආරම්භ වූ කොටස් වෙලඳපොලේ උත්පාතය ගැඹුරට බලපා ඇත. නිරන්තරයෙන් ඉහල යන කොටස් වටිනාකම්, විශේෂයෙන්ම 1995 සිට වෙලඳපොල තක්සේරුවල පිපිරීම්, මධ්‍යම පන්තියේ සැලකිය යුතු කොටසකට—විශේෂයෙන් වෘත්තීය ප්‍රභූන්ට—ඔවුන්ගේ වෘත්තීය ජීවිතය ආරම්භයේදී ඔවුන්ට සිතාගත නොහැකි තරම් ධනයකට ප්‍රවේශය ලබා දී ඇත. ඇත්ත වශයෙන්ම ධනවත් වූවන් ජනගහනයෙන් සාපේක්ෂව කුඩා ප්‍රතිශතයකි. එහෙත් සංඛ්‍යාත්මකව ගත් කල, ‘අලුතෙන් පොහොසත්’ පිරිස සැලකිය යුතු සහ දේශපාලනික වශයෙන් බලවත් සමාජ ස්ථරයක් නියෝජනය කරයි. [A Quarter Century of War: The US Drive for Global Hegemony, 1990-2016 හි ඇතුලත් “සංහාරයෙන් පසු: බෝල්කන් යුද්ධයේ දේශපාලන පාඩම්”]
එක්සත් ජනපද අධිරාජ්‍යවාදී නායකත්වයෙන් යුත් නේටෝ සන්ධානය සහ රුසියාව අතර න්‍යෂ්ටික අවි වලින් ඇවිලියහැකි ගැටුමක්—ව්‍යසනකාරී යුද්ධයක් සඳහා දෘෂ්ටිමය සාධාරනීකරනය සැපයීමට මෙම ස්ථරය දැන් අධිෂ්ඨාන කර ඇත. ඇත්ත වශයෙන්ම, ඔවුන් නායකත්වය දෙන රුසියානු විරෝධී ව්‍යාපාරයේ ම්ලේච්ඡත්වය සංසන්දනය කල හැක්කේ යුද තත්වයක් තුල සතුරු ජාතීන් රාක්ෂකරනය කිරීම සමඟ පමනි.
රුසියාවට එරෙහි නේටෝවේ යුද ධාවනයේ ස්ථිර ආධාරකරුවෙකු වන දක්ෂිනාංශික කැනේඩියානු දිනපතා පුවත්පතක් වන නැෂනල් පෝස්ට් පවා සිකුරාදා තරමක් තැති ගැනුනු ස්වභාවයකින් මෙසේ ලිවීය, “කැනඩාව සහ බ්‍රිතාන්‍ය අධිරාජ්‍යය කලබලකාරී ගතියකින්, ජර්මානු සහයෝගයේ ලේෂයක් පවා සහිතව, සියලු දෑ යලි නම් කල පලමු ලෝක යුද්ධයේ ආරම්භක මාස මෙන් සියල්ල පෙනේ. බර්ලින් ඔන්ටාරියෝ, කිචිනර් ලෙස නැවත නම් කලේය. බිංගෙන්, කාල්ස්ටාඩ් සහ ඩසල්ඩෝෆ් යන ඇල්බර්ටා ප්‍රජාවන්ට වඩා දේශප්‍රේමී නම් දෙන ලදී. රාජකීය පවුල ඔවුන්ගේ නම සැක්ස්-කෝබර්ග් සහ ගෝතා වෙතින් අතිශය බ්‍රිතාන්‍ය වූ හවුස් ඔෆ් වින්ඩ්සර් ලෙස වෙනස් කලේ ය.
එහෙත් යුද උන මධ්‍යම පන්තියේ වරප්‍රසාදිත ස්ථරයන් මත දැඩි ග්‍රහනයක් පවත්වාගෙන ඇති අතර, වර්තමාන අර්බුදය ජනගහනයේ පුලුල් මහජනතාව වන කම්කරු පන්තිය විසින් දකින්නේ ඊට හාත්පසින්ම වෙනස් ආකාරයකට ය. වසර තිහක නොනවතින යුද්ධයට සහ ඔවුන්ගේ ජීවන මට්ටම්වල අනවරත පරිහානියට පසුව, කම්කරුවන්ට ව්‍යසනකාරී ගෝලීය යුද ගිනි ජාලාවක් කරා කුලප්පු වී දිවීමට රුචියක් නැත. සංගත ලාභ ආරක්ෂා කිරීම සඳහා තම සෞඛ්‍යය හා ජීවිත පරිත්‍යාග කිරීමට ලොව පුරා ආන්ඩු විසින් කම්කරුවන්ට බල කර ඇති වසංගතයක වසර දෙකකට වැඩි කාලයකට පසුව, ඔවුන් දේශපාලන ප්‍රභූවේ සහ එහි ඉහල මධ්‍යම පන්තික හෙංචයියන්ගේ 'ප්‍රජාතන්ත්‍රවාදය' සඳහා සහ 'නිදහස් ලෝකය' වෙනුවෙන් සටන් කිරීමේ කියාපෑම් සංශයවාදීව හෝ මුලුමනින්ම අවඥාසහගතව දකී.
දැන් තීරනාත්මක කර්තව්‍යය වන්නේ ජාත්‍යන්තර කම්කරු පන්තිය අතර යුද්ධය කෙරෙහි වූ මෙම සැඟවුනු විරෝධය සමාජවාදය සඳහා සවිඥානික දේශපාලන අරගලයක් බවට පරිවර්තනය කිරීමයි.