இந்த மொழிபெயர்ப்பின் மூலக் கட்டுரையை இங்கு காணலாம்.

உலக சோசலிச வலைத் தளம் மற்றும் நான்காம் அகிலத்தின் அனைத்துலகக் குழுவினாலும் ஏற்பாடு செய்யப்பட்ட 2026 மே தின இணையவழிப் பேரணியில் ஐக்கிய வாகனத் தொழிலாளர் சங்கத்தின் (UAW) தலைவருக்கான வேட்பாளரும், தொழிலாளர் நடவடிக்கை குழுக்களின் சர்வதேச கூட்டணியின் (IWA-RFC) உறுப்பினருமான வில் லெஹ்மன் இந்த உரையை ஆற்றினார்.

உலகெங்கிலும் உள்ள நமது சகோதர சகோதரிகளே, அமெரிக்கத் தொழிலாள வர்க்கத்தின் சார்பாக நான் உங்களுக்குப் புரட்சிகர வாழ்த்துக்களைத் தெரிவிக்கிறேன். என் பெயர் வில் லெஹ்மன். நான் பென்சில்வேனியாவின் மகுங்கியில் உள்ள மேக் றக்ஸ் நிறுவனத்தில் பணிபுரிகிறேன். ஊழல் நிறைந்த தொழிற்சங்க அமைப்பிடமிருந்து அதிகாரத்தை மீட்டு, அது இருக்க வேண்டிய இடமான வேலைத் தளத்தில் நிலைநிறுத்துவதற்காக, ஐக்கிய வாகனத் தொழிலாளர் சங்கத்தின் தலைவர் பதவிக்கு நான் போட்டியிடுகிறேன். இதைவிட மிக முக்கியமான ஒரு காரணத்திற்காக நான் இந்தத் தேர்தலில் நிற்கிறேன்: அது தொழிலாளர்களைப் பொதுப் போராட்டத்தில் ஒன்றிணைப்பதற்காக ஆகும். உலகத் தொழிலாளர்களாகிய நாம், உற்பத்தியின் உலகளாவிய சக்திகளால் ஏற்கனவே ஒன்றுபட்டுள்ளோம்.

நாம் இப்போது செய்ய வேண்டியது, இன்றிலிருந்து தொடங்கி, ஒரு நனவுப்பூர்வமான போராட்ட சக்தியாக ஒன்றிணைவதுதே ஆகும். முதலாளிகள் நம்மீது திணிக்கும் இனம், மதம், அல்லது தேசியம் சார்ந்த எந்தப் பிரிவினையையும் நம்மால் ஏற்றுக்கொள்ள முடியாது. அமெரிக்கத் தொழிலாளர்கள் பல்லாயிரக்கணக்கில் போராட்டத்தில் ஈடுபட்டுள்ளனர்—விரைவில் இது இலட்சக்கணக்கில், பின்னர் மில்லியன்கணக்கில் பெருகும். இந்த ஆண்டிலேயே, நியூ யோர்க் நகரில் 15,000 தாதிமார்கள் கிட்டத்தட்ட ஒரு மாத காலம் வேலைநிறுத்தத்தில் ஈடுபட்டனர். கலிபோர்னியா மற்றும் ஹவாயில் 31,000 கைசர் செவிலியர்கள் வெளிநடப்பு செய்தனர். 1979க்குப் பிறகு சான் பிரான்சிஸ்கோ ஆசிரியர்கள் தங்கள் முதல் வேலைநிறுத்தத்தைத் தொடங்கினர். ஹார்வர்ட் பட்டதாரி ஊழியர்கள் காலவரையின்றி வெளிநடப்பு செய்தனர். மிச்சிகனில், 1,300 நெக்ஸ்டீர் வாகன உதிரிபாகத் தொழிலாளர்கள், UAWஇன் சலுகை ஒப்பந்தத்தை 96 சதவீதம் நிராகரித்தனர்; எனினும், தொழிலாளர்கள் தொடர்ந்து வேலை வாங்கப்படும் அதே நேரம், அதிகாரிகள் அவர்களுக்குத் தெரியாமல் ஒப்பந்தத்தை அமுல்படுத்துகின்றனர்.

லொஸ் ஏஞ்சல்ஸில், 80,000 தொழிலாளர்கள் வேலைநிறுத்தத்திற்குத் தயாராக இருந்தபோது, ​​அவர்களின் தொழிற்சங்கங்கள் கடைசி நிமிடத்தில் அவர்களைக் கைவிட்டன. ஒவ்வொரு கட்டத்திலும், அதிகார வர்க்கங்கள் நமது எதிர்ப்பை நசுக்குகின்றன. வேலைநிறுத்தங்கள் கைவிடப்படுகின்றன, காட்டிக்கொடுக்கும் ஒப்பந்தங்கள் வலுக்கட்டாயமாகத் திணிக்கப்படுவதுடன், இந்த மோசமான ஒப்பந்தத்தை ஏற்றுக்கொள்ளுங்கள், இதைவிட அதிகமாக எதையும் நீங்கள் எதிர்பார்க்க முடியாது என்ற செய்தி எப்போதும் கூறப்படுகிறது.

பிரச்சனை ஏதாவதொரு தொழிற்சங்கத்தின் தலைவர் அல்ல. அது பெருநிறுவன சார்பு தொழிற்சங்க அதிகாரத்துவ வர்க்கமே ஆகும். 'தொழிற்சங்க சீர்திருத்தவாதிகள்' என்று அழைக்கப்படுபவர்கள் ஏராளமாக உள்ளனர். தொழிலாளர்களாகிய நாம் செய்யக்கூடியதெல்லாம் தொழிற்சங்கங்களுக்கு அழுத்தம் கொடுப்பதும், சிறந்த அதிகாரத்துவத்தை எதிர்பார்ப்பதும்தான் என்று இடதுசாரிப் பேச்சாளர்கள் கூறுகிறார்கள். அவர்கள் தங்களையே குறிப்பிடுகிறார்கள்! ஆனால் அவர்கள் ஆட்சிக்கு வந்தவுடன், தாங்கள் பதவியிலிருந்து நீக்கிய ஊழல் அதிகாரிகளைப் போலவே நடந்துகொள்கிறார்கள். UAW தலைவர் ஷான் ஃபெய்ன் மாற்றத்தை செய்வதாக வாக்குறுதியளித்து அதிகாரத்துக்கு வந்து, திரைமறைவு ஒப்பந்தங்களையும் போலியான வேலைநிறுத்தங்களையுமே செய்தார். அமெரிக்காவின் ஜனநாயக சோசலிஸ்டுகள் அமைப்பின் உறுப்பினரான UAW அதிகாரத்துவ அலுவலர் பிராண்டன் மான்சிலா, புலம்பெயர்ந்த தொழிலாளர்களைப் பாதுகாக்கும் கோரிக்கைகளைக் கைவிடுமாறு கொலம்பியா UAW பட்டதாரி ஊழியர்களுக்கு உத்தரவிட்டார்.

டீம்ஸ்டர்ஸ் அமைப்பில் உள்ள “ஜனநாயக ஒன்றியத்திற்கான டீம்ஸ்டர்ஸ்” குழுவும், UAW அமைப்பில் உள்ள “புதிய திசைகள்” குழுவும், தொழிலாளர்களைச் சுரண்டி டிரம்புடன் ஒத்துழைக்கும் தொழிற்சங்க இயந்திரத்துடன் முழுமையாக ஒருங்கிணைக்கப்பட்டுள்ளன. இதற்கானத் தீர்வு, அதிகாரத்துவத்தில் புதிய பெயர்களையும் முகங்களையும் நியமிப்பதல்ல. அடிமட்டத் தொழிலாளர்களின் கிளர்ச்சியே இதற்குத் தீர்வு ஆகும்—நிர்வாகத்திற்கும் அரசாங்கத்திற்கும் சேவை செய்யும் தொழிற்சங்க அதிகாரத்துவத்தில் இருந்து சுயாதீனமாக, தொழிலாளர்கள் நமது சொந்த அமைப்புகளை மீண்டும் கட்டியெழுப்புவதாகும். இதன் அர்த்தம், அந்த எந்திரத்தை ஒழித்து, அதிகாரத்தைத் தொழிலாளர்களின் கைகளுக்கு மாற்றுவதற்கு தொழிலாளர்களால், தொழிலாளர்களுக்காக உருவாக்கப்பட்ட தொழிலாளர்களின் நடவடிக்கை குழுக்களை அமைப்பதாகும். தொழிற்சங்க அதிகாரத்துவங்களால் புதைக்கப்பட்ட தொழிலாள வர்க்கத்தின் பழைய ஒருமைப்பாட்டு மரபுகளை நாம் மீண்டும் உயிர்ப்பிக்க வேண்டும். ஒருவருக்கு ஏற்படும் காயம் அனைவருக்கும் ஏற்படும் காயம். நாம் பேசிக்கொண்டிருக்கும் இந்தத் தருணத்தில், நமது வர்க்கத்திற்காகப் போராடியதற்காகத் தொழிலாளர்களும் சோசலிஸ்டுகளும் உலகெங்கிலும் சிறையில் அடைக்கப்பட்டுள்ளனர்.

உக்ரேனில், 26 வயதான ட்ரொட்ஸ்கிஸ்டான போக்டான் சிரோடியுக், பொய்யான தேசத்துரோகக் குற்றச்சாட்டுகளின் பேரில் 15 ஆண்டுகள் ஆயுள் தண்டனையை எதிர்கொள்கிறார். நேட்டோவின் பினாமிப் போரை எதிர்த்ததும், ரஷ்ய மற்றும் உக்ரேனியத் தொழிலாளர்களின் ஒற்றுமைக்கு அழைப்பு விடுத்ததுமே அவர் செய்த ஒரே குற்றமாகும்—அதே தொழிலாளர்கள்தான் இப்போது களமுனைகளில் ஒருவரையொருவர் கொன்றுகொண்டிருக்கிறார்கள். துருக்கியில், சுதந்திரத் தொழிற்சங்கத் தலைவர்களான பஷரன் அக்ஸு மற்றும் மெஹ்மெத் துர்க்மென் ஆகியோர் எர்டோகன் அரசாங்கத்தால் கைது செய்யப்பட்டுள்ளனர். வழங்கப்படாத கூலியைக் கோரி 180 கிலோமீட்டர் தூரம் நடந்த 110க்கும் மேற்பட்ட துருக்கிய நிலக்கரிச் சுரங்கத் தொழிலாளர்கள் பொலிசாரினால் தடுத்து வைக்கப்பட்டனர்.

இந்தியாவில், தொழிற்சாலையில் கொத்தடிமை நிலைமைகளுக்கு எதிராகப் போராடியதற்காக, மாருதி சுசுகி வாகனத் துறையைச் சேர்ந்த 13 தொழிலாளர்கள், பொய்யான கொலைக் குற்றச்சாட்டுகளின் பேரில் பத்தாண்டுகளுக்கும் மேலாகச் சிறையில் அடைக்கப்பட்டுள்ளனர். போக்டான் சிரோடியுக், மாருதி சுசுகி தொழிலாளர்கள், பஷாரன் அக்ஸு, மெஹ்மத் துர்க்மென் மற்றும் அனைத்து வர்க்கப் போர்க் கைதிகளையும் உடனடியாக விடுதலை செய்ய வேண்டும் என்று நான் கோருகிறேன். அவர்களின் சிறைவாசம், உலகெங்கிலும் உள்ள தொழிலாளர்கள் மீதான ஒரு தாக்குதலாகும். அத்துடன், புலம்பெயர்ந்த தொழிலாளர்கள் மீதான துன்புறுத்தலுக்கு ஒரு முடிவுகட்ட வேண்டும் என்றும் நான் கோருகிறேன்.

ஜனநாயகக் கட்சியினரின் ஆதரவுடன் செயல்படும் ட்ரம்ப் நிர்வாகம், ஒட்டுமொத்த தொழிலாள வர்க்கத்தின் மீதான ஒரு தாக்குதலாக, நமது புலம்பெயர்ந்த சகோதர சகோதரிகளை—நமது சக ஊழியர்களை, அயல்வாசிகளை மற்றும் நண்பர்களை—சுற்றிவளைத்து வருகிறது. இது பிரித்தாளும் சூழ்ச்சியாகும். ட்ரம்ப் அமெரிக்கத் தொழிலாளர்களிடம் பொய் சொன்னார்: அவர் புலம்பெயர்ந்தோரைப் பலிகடாவாக்கி, தனது கோடீஸ்வர கூட்டாளிகளுக்கு லாபத்தைத் திருப்பிவிட்டார். அவர் உற்பத்தித் துறையில் ஒரு பெரும் வளர்ச்சியை ஏற்படுத்த வாக்குறுதியளித்த போதிலும், நமக்குக் கிடைத்ததோ தொழிற்சாலை மூடல்கள்தான். பணவீக்கத்தை வெல்வதாக அவர் வாக்குறுதி அளித்தார், ஆனால் அதற்குப் பதிலாக, ஒவ்வொரு நாளும் நமது குறைவான சம்பளத்தில் போதாகுறையான உணவு, எரிபொருள், உடை மற்றும் மருந்துகளையே வாங்க முடிகிறது.

நாங்கள் இதை ஒவ்வொரு நாளும் வாழ்ந்து அனுபவித்துக்கொண்டிருப்பதால், தொழிலாளர்களாகிய நாங்கள், இதை இப்படியே தொடரவிட முடியாது என்பதை அறிவோம். போர், பணவீக்கம் மற்றும் விலையேற்றம் ஆகியவற்றால், நாங்கள் முன்னெப்போதையும் விடக் கடுமையாக உழைத்தாலும், எங்கள் உண்மையான சம்பளம் குறைந்து வருகிறது. முதலாளிகளின் கைகளில் இருக்கும் செயற்கை நுண்ணறிவும் ரோபோட்டிக்ஸும், அதே சம்பளத்தில் எங்கள் குடும்பத்தினருடன் அதிக நேரம் செலவிட எங்களுக்கு உதவாது. மாறாக, அவை பெருமளவிலான ஆட்குறைப்புக்கும், மேல்தட்டு 1 சதவீதத்தினருக்கு மேலும் செல்வம் சேர்ப்பதற்குமே பயன்படுத்தப்படும். இதற்கிடையில், முதலாளிகளும் அவர்களது அரசாங்கங்களும் முழு உலகையும் சர்வாதிகாரத்திற்கும் போருக்கும் இழுத்துச் செல்கின்றன.

முதலாளிகள் சண்டையிட்டு இறக்கப் போவதில்லை. நாம்தான் இறப்போம். எனவே, நாம் என்ன செய்ய முடியும்? இருநூற்று ஐம்பது ஆண்டுகளுக்கு முன்பு, அமெரிக்கப் புரட்சியின் தொடக்கத்தில், எனது மாநிலமான பென்சில்வேனியாவில் டொம் பெயின் என்ற குடியேறிய கைவினைத் தொழிலாளி, “உலகை மீண்டும் புதிதாகத் தொடங்கும் சக்தி நம்மிடம் உள்ளது,” என எழுதினார்.

சகோதர சகோதரிகளே, உலகத் தொழிலாளர்களாகிய நம்மிடம் உண்மையில் அந்த சக்தி இருக்கிறது. நாம்தான் எல்லாவற்றையும் உருவாக்குகிறோம், எல்லாவற்றையும் நகர்த்துகிறோம், அனைவருக்கும் உணவளித்து, பராமரித்து, கற்பிக்கிறோம். அனைத்துத் தொழிலாளர்களையும், துறைகள் மற்றும் நாடுகள் கடந்து தொழிலாள வர்க்கத்தின் ஒன்றுபட்ட இயக்கத்திற்கான ஒரு முன்னணி அமைப்பாக, சாமானிய தொழிலாளர் குழுக்களின் சர்வதேசத் தொழிலாளர் கூட்டணியில் (IWA-RFC) இணைந்து அதை உருவாக்குமாறு நான் அழைக்கிறேன். நாம் முதலில் கடக்க வேண்டியது நமது சொந்த பயத்தையும் தயக்கத்தையும்தான். இதை நம்மைத் தவிர வேறு யாரும் செய்ய மாட்டார்கள். உலகத் தொழிலாளர்களே, ஒன்றுபடுங்கள். நாம் இழப்பதற்கு இனி எதுவும் இல்லை, நாம் வெல்வதற்கு ஒரு உலகம் இருக்கிறது.