(මෙය Spring offensive” produces bloodbath for Ukraine මැයෙන් 2023 ජුනි 14 වන දා වූ ඉදිරි දර්ශ න ලිපියේ පරිවර්තනය යි.)

පසුගිය සතියේ යුක්‍රේන “ප්‍රතිප්‍රහාරය” ආරම්භ වූ විට, ඇමරිකානු මාධ්‍ය විසින් එය ඔජවැඩුවේ, රුසියාවට එරෙහි එක්සත් ජනපද-නේටෝ යුද්ධයේ තීරනාත්මක හැරවුම් ලක්ෂ්‍යයක් ලෙස විස්තර කරමිනි.

රුසියාව සඳහා ' අතිශයින්ම විනාශකාරී සහ නොවරදින පරාජයක්” අත්කර දෙනු ඇති “යුක්‍රේනය අරභයා තරඟයේ නිමාවක්' නිව් යෝර්ක් ටයිම්ස් හි බ්‍රෙට් ස්ටැෆන්ස් විසින් ප්‍රකාශයට පත් කෙරුනි. වොෂින්ටන් පෝස්ට් තීරු ලිපි රචක මැක්ස් බූට්, “යුක්‍රේනියානුවන් සැලකිය යුතු ජයග්‍රහන අත්කර ගැනීමටත්, බොහෝ විශ්ලේෂකයින් පුරෝකථනය කරනවාට වඩා බොහෝ දේ ඉටුකර ගන්නා බවටත්” ඔහු අපේක්ෂා කරතැයි කියන ජෙනරල් ඩේවිඩ් පෙට්‍රවුස් උපුටා දැක්වූවේ ය.

මෙම ප්‍රකාශ සියල්ලම සාවද්‍ය මෙන්ම ස්වයං-මිත්‍යාමය බව සනාථ වී ඇත.

දින දහයක් ගත වෙන තැන, ආක්‍රමනය, ඔවුන්ගෙන් බොහෝමයක් සුලු හෝ කිසිදු පුහුනුවක් නොදී අලුතින් බඳවා ගත් යුක්‍රේන සොල්දාදුවන් සම්බන්ධයෙන් මහා රුධිරස්නානයක් බවට පරිවර්ථනය විය . යුක්‍රේන රජය කියා සිටින්නේ පසුගිය සතිය තුල දහස් ගනනකගේ ජීවිත බිලි ගනිමින් වර්ග සැතපුම් 40ක භූමි ප්‍රදේශයක් අල්ලා ගත් බවයි. යුක්‍රේන හමුදාවන්ට ඉතා කුඩා ගම්මානයක් අල්ලා ගැනීමට සහ පැය කිහිපයක් රඳවා ගැනීමට ඇති හැකියාව, දැවැන්ත ජයග්‍රහනයක් ලෙස එක්සත් ජනපද මාධ්‍ය විසින් විස්තර කරන මට්ටමට එය පැමින ඇත.

යුද්ධයේ වත්මන් තත්වය සිහිපත් කරනුයේ පලමුවන ලෝක යුද්ධයේදී එහි ප්‍රථම දිනයේදීම 60,000ක් තරම් ජීවිත හානි ඇතිකල “සොම්මේ” (1වැනි ලෝක යුද්ධයේදී බටහිර පෙරමුනේ කොටසක්; ප්‍රංශය තුල පලාතක්-පරිවර්තක) සටන වැනි බිහිසුනු ලේ වැගිරීම්‍ ය. යුක්‍රේනයේ මරන සංඛ්‍යාව මෙම මට්ටමට ලඟා වී නැති නමුත්, යුක්‍රේන සොල්දාදුවන් විශාල සංඛ්‍යාවකින් මරා දමමින් තිබෙන බවට සැකයක් නැති අතර, එය සමවනුයේ නූතන යුගයේ යුද අගල් සංහාරයට යි.

යුක්‍රේනය විසින් පරස්පරතාවයන් ප්‍රකාශයට පත් නොකල දත්ත වලට අනුව, රුසියානු නිලධාරීන් ප්‍රකාශ කරන්නේ ප්‍රහාරයේදී දිනකට යුක්‍රේනියානුවන් 1,000 කට අධික සංඛ්‍යාවක් මිය යන බවත්, එමඟින් මේ දක්වා මුලු යුක්‍රේන මරන සංඛ්‍යාව අවම වශයෙන් 10,000 ක් පමන විය හැකි බවත්‍ ය.

යුද්ධයේ බිහිසුනු බව සාමාන්‍යයෙන් මාධ්‍ය තුල වසන් කරද්දී, යථාර්ථය පිලිබඳ යම් ආකාරයෙන් පිලිගැනීමක් ඉස්මත්තට පැමින ඇත. එක්සත් ජනපද නිලධාරියෙකු උපුටා දක්වමින් ගාඩියන් පුවත්පත වාර්තා කලේ, “විනාශකාරී මිල අධික යුදකෙලිය ඉදිරි මාස ගනනාවක් පුරා ඇදී යතැයි පෙනී යන” බවයි. රුසියානු හමුදාවන්ට සිදු වූ හානිය 'සැලකිය යුතු නොවේ' යැයි නිලධාරීන් පැවසූ අතර 'රුසියානුවන් දිය වී යාමාට නියමිත බවත්, යුක්‍රේනියානුවන් ඔවුන්ගේ ආරක්ෂක රේඛාව හරහා කෙලින්ම ඉදිරියට යමින් සිටීය යන අදහස කොහෙත්ම යථාර්ථයන් නොවන ' බව එම නිලධාරියා කීවේ ය.

නිව්‍යෝක් ටයිම්ස් පුවත්පතට ලිපියක් ලියූ හෙලීන් කූපර්, “ප්‍රතිප්‍රහාරයෙන් යුක්‍රේනයට විශාල හානියක් සිදු වේවිද?” හිත්පිත් නැති ලෙස ප්‍රශ්නයක් නඟා 'එය දැනටමත් සිදුවෙමින් පවතී” යැයි පිලිතුරු දුන්නේය. “මුල් සටන්වලදී, යුක්‍රේන හමුදා ජීවිත හානි සහ උපකරන අහිමි වී ඇති බව එක්සත් ජනපද නිලධාරීන් තහවුරු කර ඇත. රුසියානු පාඩු පිලිබඳ තොරතුරු ඉතා අල්පය, නමුත් නිලධාරීන් පෙන්වා දුන්නේ, කලින් සඳහන් කල හේතු නිසා ප්‍රහාරකයින්ට සාමාන්‍යයෙන් ආරක්ෂකයින්ට වඩා බරපතල ආරම්භක තුවාල සිදුවන බවයි”.

අනතුරුව ටයිම්ස් “ඒ කියන්නේ ප්‍රතිප්‍රහාරය අසාර්ථක වෙමින් තිබේද?” යැයි විමසා මෙසේ පිලිතුරු දෙයි: 'නැහැ. එක්සත් ජනපද නිලධාරීන් දෙදෙනෙක් සඳුදා කියා සිටියේ ප්‍රතිප්‍රහාරයේ මූලික පිම්ම ආරම්භ වී නොතිබුනා වියහැකි බවයි”.

වෙනත් වචන වලින් කිවහොත්, මරන සංඛ්‍යාව අත්තිකාරම් ගෙවීමක් පමනි. මොනම තැකීමක්වත් නැතිව, එක්සත් ජනපදය හා නේටෝ බලවතුන් ඔවුන්ගේ මාධ්‍ය ප්‍රකාශකයන් සලකන්නේ යුක්‍රේනියානුවන්ගේ ජීවිත යුද්ධයේ වෙඩිඋන්ඩ පමනක් බවයි. 'ස්ලාවා යුක්‍රේනි' (යුක්‍රේනයට අභිමානය) යන ෆැසිස්ට් සටන් පාඨය 'යුක්‍රේනියානුවන් සංහාරය කිරීම' යන යථාර්ථය බවට රූපාන්තරනය කෙරී ඇත.

මේ කුමන අරමුනක් වෙනුවෙන් ද? ආරම්භයේ සිටම යුක්‍රේන ප්‍රහාරයේ සැබෑ අරමුන වූයේ නේටෝ සංවිධායන යුද්ධය තුල තවදුරටත් සම්බන්ධවීමට අවශ්‍ය දේශපාලන කොන්දේසි නිර්මානය කිරීමයි.

නිව්‍යෝර්ක් ටයිම්ස් සෙනසුරාදා ලියූ පරිදි:

රුසියාවේ හමුදාව විනාශ කිරීමෙන් යුධ පිටියේ ලබාගන්නා සාර්ථකත්වය, යම් භූමි ප්‍රදේශයකට හිමිකම් කීම හෝ ඒ දෙකම ... කියෙව් (යුක්‍රේනය-පරි.) සඳහා යම් ආකාරයක දිගු කාලීන ආරක්ෂක සහතිකයක් සඳහා යුරෝපය තුලින් වැඩි සහයෝගයක් ගොඩනැඟනු ඇත.

යුක්‍රේනය සහ බටහිර මිත්‍ර රටවල් දෙපාර්ශවයම ප්‍රතිප්‍රහාරය සඳහා ආයෝජනය කර ඇත්තේ, නිශ්චිත ප්‍රතිඵලය කුමක් වුවත්, එය යුද්ධයේ මීලඟ අදියර සඳහා වේදිකාව සකසන බැවිනි. යුක්‍රේනය සුරක්ෂිත කිරීමට උදව් කිරීමට ඇමරිකානු සහ බ්‍රිතාන්‍ය සැලැස්මට එක්සත් ජනපදයේ සහ නේටෝ රටවල් තුලින් ශක්තිමත් ආරක්ෂක සහතික කිරීම් සඳහා සහාය ගොඩනැගීම ඇතුලත් වේ.....

බ්‍රහස්පතින්දා, ආරක්ෂක ලේකම් ලොයිඩ් ඔස්ටින් සහ ඒකාබද්ධ මාන්ඩලික ප්‍රධානීන්ගේ සභාපති මාර්ක් මිලී විසින් යුක්‍රේන ආරක්ෂක සම්බන්ධතා කන්ඩායමේ රැස්වීමක් රැම්ස්ටයින් ගුවන් කඳවුරේදී පවත්වනු ඇත. ජූනි 16දා නේටෝ ආරක්ෂක අමාත්‍යවරුන්ගේ සමුලුව අනතුරුව පැවැත්වෙනු ඇත.

මෙම රැස්වීම් ජූලි 11-12 ලිතුවේනියාවේ විල්නියස් හි පැවැත්වෙන නේටෝ සමුලුව සඳහා වේදිකාව සකසනු ඇත. නේටෝ බලවතුන් යුක්‍රේනය සමඟ යම් ආකාරයක විධිමත් මිලිටරි සන්ධානයක් ප්‍රකාශයට පත් කිරීමට එහිදී බලාපොරෝතු වන අතර, එය ගැටුමේදී නේටෝ හමුදාවල සෘජු මැදිහත්වීම සඳහා වේදිකාව සකසනු ඇත.

අඩියක් පස්සට ගෙන සිටි රුසියාවකට අවසන් නිවේදනය නිකුත් කිරීමට අරමුනු කරන ලද විජයග්‍රාහී ආක්‍රමනයක් පිලිබඳ පසුබිමෙහි, විල්නියස් රැස්වීම සලකනු ලැබුයේ ජයග්‍රාහකයන්ගේ සමුලුවක් වසයෙනි. එහෙත් ඊට හාත්පසින්ම වෙනස් දර්ශනයක් මතුවෙමින් තිබේ: මිලිටරි පරාජයකට මුහුන දී සිටින එක්සත් ජනපදය යුද්ධයට එහි මැදිහත්වීම තීව්‍ර කරමින් සිටී.

වෝල් ස්ට්‍රීට් ජර්නලය අඟහරුවාදා වාර්තා කලේ, පිලිකාකාරක සහිතබවට හඳුනාගෙන තිබෙන විකිරනශීලිතාව අඩු යුරේනියම් ආයුධ යුක්‍රේනයට යැවීමට බයිඩ්න් පරිපාලනය තීරනය කර ඇති බවත්, පොකුරු බෝම්බ යෙදවීම ගැන ක්‍රියාකාරීව සාකච්ඡා කරමින් සිටින බවත් ය.

සිකුරාදා, ඇමෙරිකානු ව්‍යවසාය ආයතය (American Enterprise Institute), එක්සත් ජනපද න්‍යෂ්ටික අවි යුක්‍රේනයට යෙදවීම සඳහා අද්වකාත් සේවයේ යෙදෙන ජ්‍යෙෂ්ට සාමාජිකයෙකයන්ගෙන් අයෙක් වන මයිකල් රූබින්ගේ උපදේශ කොලමක් පල කලේ ය. කොලමේ මාතෘකාව වූයේ, “ යුක්‍රේනයට එරෙහි රුසියාවේ න්‍යෂ්ටික ප්‍රහාරයක් වැලැක්විමට බයිඩ්න්ට හැකිද? ඔව්, (ඒ) ඔහු යුක්‍රේනයට උපායශීලී න්‍යෂ්ටික අවි ලබා දෙන්නේ නම්” යන්නයි.

“යුක්‍රේනය ඒවා භාවිතා කරන්නේ කොහේද සහ කෙසේද යන්න පිලිබඳ කිසිදු පාලනයකින් තොරව” යුක්‍රේනයට න්‍යෂ්ටික අවි ලබා දෙන ලෙස රූබින් ධවල මන්දිරයට බල කලේ ය. අවසාන වශයෙන්, නේටෝ බලවතුන් යුක්‍රේනය නේටෝවට ඇතුලත් කර ගැනීම හෝ යම් ආකාරයක විධිමත් මිලිටරි සන්ධානයක් කරා වේගයෙන් ගමන් කරමින් සිටින අතර, එය ගැටුමට සෘජු නේටෝ මැදිහත්වීමක් සඳහා වේදිකාව සකසනු ඇත.

යුක්‍රේනයේ යුද්ධය, බයිඩ්න් පරිපාලනයට සහ නේටෝවේ පැවැත්මම පිලිබඳ ප්‍රශ්නයක් බවට පත්ව තිබේ. යුක්‍රේනයේ රුධිරස්නානය නිසා අධිරාජ්‍යවාදීන්ට රුසියානු කාලතුවක්කුවලට විසි කිරීමට තවත් සිරුරු සොයා ගැනීමට අවශ්‍ය වනු ඇත.

මිලිටරිය පරාජයන්ට ප්‍රතිචාර දැක්වීමේදී ප්‍රහාර උත්සන්න කිරීම මගින්, එක්සත් ජනපදය දීර්කාලයක් තිස්සේ අනුගමනය කරන රටාව යලි අනුගමනය කරමින් සිටී. මෙම යුද්ධය නතර නොකලහොත් එය සමස්ත මනුෂ්‍ය වර්ගයාටම මහා ව්‍යසනයක් තුලට කැරකී යනු ඇත.

ප්‍රති-ප්‍රහාරයේ පලමු දිනට පසුව ජූනි 5දා ලෝක සමාජවාදී වෙබ් අඩවිය මෙසේ ලිවීය:

මානව වර්ගයා න්‍යෂ්ටික යුද්ධයක පූර්න විනාශය දෙසට ඇදගෙන යමින් තිබෙන අධිරාජ්‍යවාදයට එරෙහි සටන සමග, කම්කරු පන්තියේ වර්ධනය වන ව්‍යාපාරය සම්බන්ධ කිරීම හදිසි අවශ්‍යතාව යි. මිලිටරිවාදයට හා යුද්ධයට එරෙහි විරෝධය, අසමානතාව, සූරාකෑම හා මානව වර්ගයා මුහුන දෙන සියලු අර්බුදයන්ගේ මූලික හේතුව වන ධනේශ්වර පද්ධතියට එරෙහි විරෝධය සමග ඒකාබද්ධ කිරීම අවශ්‍ය ය..

දැන් යුක්‍රේනයේ ප්‍රතිප්‍රහාරය ලේවැකි පරාජයක් නිර්මානය කර ඇති බැවින් මේ මොහොත, එවන් ව්‍යාපාරයක් ගොඩනැගීම සෑම අතින්ම අත්‍යවශ්‍යව පවතී .